Fall/frí

Eins og kannskir margir hafa heyrt tók ég mér smá frí frá MM um helgina. Ástæðan var nokkuð margþætt. Fyrsta sem gerðist var að ég fokkaðist upp á rifbeini á víkingaþreksæfingu á fimmtudaginn. Ég veit ekki nákvæmlega hvað gerðist, hélt fyrst að þetta væri hlaupastingur, en líklegast hefur þetta gerst í æfingu þar sem ég var með öðrum gæja að bera hvorn annan yfir salinn. Væntanlega er ég mjög illa brákaður eða hreinlega brotinn. Hvort sem er þýðir að eina sem ég get gert er að fara rólega og passa upp á rifbeinið. En þetta þýðir að ég get ekkert hreyft mig á næstunni, enda er ég með stöðugan verk og á meira að segja í mestu erfiðleikum með að sofa.
Á fimmtudagskvöldið var mér síðan boðið út að borða á Grillið. Þar fannst mér frekar ómeistaralegt að segja nei við fína Burgundy-víninu, vintage púrtaranum og flottu súkkulaðikökunni. Í kjölfarið var mér síðan falið það verkefni af mínum vinnuveitanda að fara með Tom Six, leikstjóra Human Centipede myndanna, út á lífið í Reykjavík, á fös og lau. Reyndar fór ég greinilega of harkalega með aumingja drenginn því hann var rúmfastur á laugardeginum.
En allavega, ok ég leyfði mér hitt og þetta um helgina en er aftur kominn af stað, allavega í paleo-inu, kláraði Gerplu osfrv, þannig að þetta er bara hluti af stóra átakinu, sem er að gera MM að hinu almenna í lífinu. Og því held ég áfram eins og ekkert hafi í skorist.

Ekkert stress, verið hress… bless… 

Tindur #2 - Akrafjall

Á laugardaginn skellti ég mér upp á Akrafjall. Ég var vaknaður kl. 9 og að keyra upp að Akrafjalli frá miðborg Reykjavíkur tók ekki nema 40 mín. Ég var hins vegar frekar lengi að finna bílastæðið við fjallið.
Þrátt fyrir að nær ekkert sé merkt við eða á fjallinu er frekar basic að labba þarna.

Ég ákvað að labba í kringum allt fjallið, en eins og fólk ætti að vita liggur það í hálfgerðan hring, með dal í miðjunni.

Ég var bara einn á ferð og hafði meðferðis eftirfarandi diska í Walkmanninn:
My Bloody Valentine - Isn’t Anything
My Bloody Valentine - Loveless
My Bloody Valentine - Ecstasy And Wine 
Godspeed You! Black Emperor - Lift Your Skinny Fists Like Antennas to Heaven

Gangan var mjög gefandi og góð. Ekkert sérstaklega erfið en löng, og þess vegna voru leggirnir orðnir nokkuð þreyttir undir lokin, en alls tók gangan fjóran og hálfan tíma.

Nett!

 

Lundi

Þegar þessi dagur rennur sitt skeið á enda er ég búinn að vera heilar tvær vikur í Meistaranum. Enn eru samt fjórar vikur eftir (hætti ekki fyrr en laugardaginn 3. des).

Ég er temmilega sáttur með allt saman. Áfengisbindindið er pís of keik, ég er oftast að hreyfa mig tvisvar á dag og mér gengur þokkalega að vinna í markmiðunum mínum. Í vikunni náði ég t.d. í fyrsta sinn á ævi minni að synda “straight” 1000m skriðsund og ég er loksins að klára fyrstu Laxness-bókina (Gerpla er ekkert grín). Og þrátt fyrir að ég sé að hreyfa mig svona mikið fór ég í fyrsta sinn út að skokka á föstudagskvöldið. Tíminn minn var ekki alveg nógu góður, þannig að ég þarf aðeins að step up my game ef ég á að ná 10 km undir 60 mín, en ég er fullviss um að ná því.

Ég er enn á 100% paleo og finnst það bara helvíti fínt. Helgin var samt erfið, því djöfull sem mig langaði að fá mér eitthvað möns. Þurfti líka að neita mér um mega kræsingar í fjölskylduboði í gær.

En ég er státtur, fjandakornið sem ég er sáttur með tilveruna þessa daganna.

p.s. Fyrirsögnin hefur ekkert að gera með innihald þessa pósts.

View high resolution

Akrafjall!

Kvöldmatur deluxe

Í gær var tiltektardagur á i8. Af þeim sökum eldaði ég dýrindis máltið fyrir okkur á i8. Í matinn var eftirfarandi: Marineruð svínalund með sætri kartöflu og gvakamóle, kashewhneturjóma og spínati með mangósalsa. Að neðan eru uppskriftirnar, mæli sérstaklega með kashewhneturjómanum (stal hugmyndinni af Café Sigrúnu).

Marinering fyrir grísalund (semí það sem ég fann í ísskápnum):
- Ólívuolía
- Sojasósa
- Dijon sinnep 
- Sulta
- Safi úr 1 sítrónu
- Balsamik edik
- Steinselja
- Timjan
- Salt og pipar
Látið kjötið liggja í þessu eins lengi og hægt er.

Gvakamóle:
- 3 þroskuð avókadó (stór, annars ca. 5 lítil)
- 1 tómatur
- Hálf paprika
- Safi úr 1 lime (endilega að rífa líka smá börk) 
- Chili (að vild)
- Salt og pipar
Avakadó stappað með gafli. Tómatur, paprika og chili saxað mjög smátt. Síðan bara blandað saman.

Kashewrjómi:
- 200 gr. kashewhnetur
- 4 döðlur
- 2 tsk. vanilludropar
- Safi úr einni stórri appelsínu (ca. 120-150 ml)
Hnetur og döðlur látið liggja í vatni í allavega 2 tíma. Síðan er þessu öllu skelt í matvinnsluvél og hakkað saman, þangað til að þetta er orðið rjómakennt.

Mangósalsa:
- 1 laukur
- 1 mangó
- Chili (að vild)
- Maukaðir tómatar (ca. 125 ml)
- 2 msk. edik
- Salt og pipar
Laukur saxaður smátt og steikur á pönnu. Mangó skorið í litla bita og sett á pönnu. Svo er chili bætt við. Látið malla í smá stund, bætið síðan rest út í og mallið aðeins lengur.

Gott er að geyma gvakamóleið, mangósalsað og kashewrjómann í ísskáp í dálitla stund.

Grísalundina steikti ég fyrst á grillpönnu, en bara rétt til að loka kjötinu, þeas steikja hverja hlið í ca. 30 sek. Síðan inn í ofn á ca. 180°-200°, í 10 til 15 mínútur.
Sama gerði ég við sætu kartöflurnar. Steikti þær á pönnu þangað til þær fá á sig fallega áferð, og síðan inn í ofn.

Verði ykkur að góðu…

View high resolution

Tad sest vel hver af tessum er meistari…

Morgunboozt #3 - Festival

- 1 Kiwi

- Handfylli af berjablöndu

- Góð sneið af melónu

- 1 chili

- Hálft mangó

- Hálf rauð paprika

- Hálf agúrka

- 3 cm af engifer

- Stór matskeið af hörfræjum (sem þarf annað hvort að vera búið að leggja í bleyti eða mylja)

- Klakar

- Vatn til að þynna

Á að vera nóg í vel rúman lítra.

Tindur #1 - Hengill

Á laugardaginn ákvað ég að ganga upp á Hengil, einn. Bauð reyndar Aroni með en hann komst ekki (les: nennti ekki). Veðrið var skítsæmilegt, allavega í bænum; pínu þungbúið, smá úði og ekkert svo mikill vindur. Þannig var veðrið svo sannarlega ekki uppi á Hengli.

Af því að ég var einn að krúttast í náttúrunni valdi ég með mér geisladiska við hæfi í Walkmanninn (það er svona tæki, svokallaður ferðageislaspilari, sem spilar bara geisladiska. Illað sjitt). Diskarnir voru, í þeirri röð sem ég spilaði þá:
Björk - Vespertine (besta plata Bjarkar?)
Sigur Rós - ( )
múm - Yesterday Was Dramatic, Today Is Ok

Það er alltaf jafn skemmtilegt hvernig þessi líflausu risar breytast í undraveröld um leið og maður stígur inn í ríki þeirra.

Leiðin upp á topp var mjög skemmtileg. Hún var frekar erfið í byrjun en síðan var þetta nokkuð aflíðandi. Það sem gerði mér hins vegar erfitt fyrir var veðrið. Um leið og ég var kominn nokkuð hundruð metra upp var norðanáttin orðin gargandi beint framan í mig, með stingandi rigningu. Á tímabili var líka smá haglél, sem barðist svo harkalega á mér að ég hélt að ég myndi merjast í framan. Vindurinn og veðrið gerðu gönguna margfalt erfiðari. Ég var samt ágætlega vel búinn og klæddur, nema að ég var í alltof lélegum hönskum. Á tímabili gat ég samt varla gengið útaf strekkingnum.

Ég komst samt upp á einhvers konar topp - en það var erfitt að greina svæðið í kring sökum þoku. Öll leiðin er samt greiðlega merkt með stikum. Ég hefði viljað ná mynd á toppnum, en það var ekki séns útaf veðrinu.

Ég ákvað samt eftir tæplega tveggja tíma göngu að byrja að snúa við, enda þá orðinn rennandi blautur, og ískaldur á höndum og fótum (þrátt fyrir að hafa skipt einu sinni um ullarsokka). Mig langaði samt ekki að fara sömu leið tilbaka og fór þess vegna út fyrir merkta leið, niður gil og þurfti síðan að klöngrast yfir lækjarsprænur og klifra fleiri gil, þangað til ég fann vegslóða sem leiddi mig aftur á rétta braut.

Ég kom síðan niður, eftir rúmlega þriggja tíma göngu, rétt áður en kolniðamyrkur skall á. Ég hefði semí ekki meikað hálftíma í viðbót - útaf kulda. Ég var hins vegar með næga orku, þar sem ég hafði tekið með fullt af hnetum og ávöxtum.
Bílferðin heim var samt ein sú kaldasta sem ég hef upplifað. Blautur og jökulkaldur náði ég loks að skríða upp í rúm og heita sturtu, en það tók mig síðan meira en klukkutíma að losna við kuldaskjálftann.

Ég var samt heaví ánægður með þessa göngu og ég ætla 100% upp á Hengil aftur, en þá væntanlega í betra veðri. 

View high resolution

Paleo hadegismatur i Ikea…